Група автори неодамна во ООУ „Мирче Ацев“ во Ѓорче Петров, Скопје, промовираа Речник на поими од медиумската писменост за наставниците со Игровни активности за усвојување, утврдување и примена на поимите од речникот. Во овој речник има соодветен превод на дел од поимите од медиумската писменост што досега се користеа како англицизми.

Со преводите и толкувањето на поимите, наставниците добиваат значајна помош во реализацијата на содржини од медиумската писменост за полесно да им објаснат на учениците што е тоа интернет, дигитален простор, апликација, икона, емотикони, гиф…

Уште поголема поддршка за наставниците претставуваат игровните активности со чија помош учениците ќе ги усвојуваат и применуваат новонаучените поими, како, на пример, кликбејт – обично е потресен или сензационалистички наслов, каде насловот и содржината на текстот не се совпаѓаат, односно е лажна информација за да измами или лажно да наведува.

Речникот и игровните активности се финален продукт што произлезе од активностите во проектот „Намали ризик – медиумска писменост на македонски јазик“, како субгрантиран проект на „Do not MIS/DIS – TechCamp“ Охрид во организација на Стејт департментот преку Амбасадата на САД и партнерската организација Центар за иновации и дигитална едукација „Диг-ед“.

Автори на овој речник и игровни активности се м-р Елена Апостолова, Добри Јовевски и Гордана Анастасова.

(Текстот е објавен во „Културен печат“ број 237, во печатеното издание на весникот „Слободен печат“ на 29-30.6.2024)