Иако нивниот настап на овогодинешниот Вимблдон (1-14 јули 2024 год.) беше под голем прашалник, Новак Ѓоковиќ и Енди Мареј се најдоа во ждрепката за третиот Грен слем турнир во сезоната и се уште не се откажале од намерата да се појават пред тениските фанови во Ол Ингланд клубот.

На два дена пред почетокот на турнирот во таборот на Ѓоковиќ владее оптимизам, додека во таборот на Енди Мареј неизвесност. И двајцата треба да ги одиграат првите мечеви во вторник, и двата против чешки противници: Ѓоковиќ ќе се соочи со квалификантот Вит Коприва, а Мареј со Томаш Мачач.

Седумкратниот шампион на Вимблдон, Ѓоковиќ, судејќи според изјавите што ги даде во саботата за состојбата на неговото колено, кое исто така беше подложено на хируршка интервенција, чувствува дека е подготвен за грен слем турнирот.

– Во последните три дена имав многу интензивни тренинзи. Играв поени и сетови против Синер, Френсис Тиафо, вчера имав двојна програма против Медведев и Емил Русувуори, а денеска тренирав и со Руне. Коленото добро се држеше, што е одличен знак кога станува збор за мојот настап на Вимблдон.

Кога ќе започне турнирот, дефинитивно повеќе ќе знам за тоа како реагира коленото на Грен слем меч во три сета. Сè што направив досега беше позитивно – изјави најуспешниот тенисер на сите времиња.