Израелскиот премиер Бенјамин Нетанјаху денес предупреди дека Израел жестоко ќе одговори на секој напад и порача дека цврсто стои со Соединетите Американски Држави, како и дека го поддржува убиството на иранскиот генерал Касем Сулејмани.

– Кој и да се обиде да не нападне, ќе прими најсилен удар – порача Нетанјаху од Ерусалим.

Тој рече дека Израел цврсто го поддржува американскиот претседател Доналд Трамп, наведувајќи дека треба да му се честита на лидерот на САД за брзата, смела и одлучна одлука во врска со Иран.

Иран претходно се закани дека ќе ја бомбардира Хаифа во Израел и Дубаи ако САД се одмаздат за синоќешниот ирански ракетен напад на двете американски бази во Ирак.

– Ги предупредуваме сите американски сојузници кои доделиле бази на нивната терористичка војска, дека секоја територија која ќе послужи како почетна точка за агресивни акти против Иран ќе биде цел – соопшти Иранската национална гарда.