За работата на извршителите, во 2021 година, до Народниот правобранител се поднесени 149 претставки. Во 2020 година пак, имало 195 претставки, пишува во Извештајот за работата на Народниот правобранител.

„Во однос на висината на наградите и надоместоците на трошоците за работа на извршителите, Народниот правобранител останува на констатацијата дека и покрај измените на Законот за извршување и Тарифата за награда за работата на извршителите со кои беше предвидено нивно намалување, овие износи и натаму се високи. Следствено треба да се истакне дека продолжува праксата на некои извршители за намерно зголемување на трошоците на извршување и каматите, со непреземање извршни дејства за наплата на побарувањата, по издавање на налозите за извршување“, нотира Народниот правобранител.

Оттаму констатираат дека има случаи кога извршните дејствија за наплата на побарувањата се преземаат дури и неколку години по издавање на налогот за извршувања, така што за тој период се зголемуваат и каматите и трошоците за извршување, што во крајна линија претставува додатно парично оптоварување за должникот во постапката.

„Во овие случаи, на подносителите им е укажано дека заштита на нивните права, покрај до Народниот правобранител треба да побараат и пред надлежните судови. Ова, со оглед на тоа што работата на извршителите е подложна на контрола од нивна страна, на начин и во постапка определена во соодветните одредби од Законот за извршувањето и единствено судот ги утврдува сторените незаконитости и ги става вон сила преземените извршни дејствија или пак, го утврдува пропуштањето за преземање на определено законско дејствие“, укажува Народниот правобранител.

Од вкупниот број поднесени претставки во текот на минатата година, 99 се однесуваа на наводи за неправилности во постапките на извршување во кои граѓаните побараа интервенција во однос на неуредната достава, висината на наградите, извршните трошоци и пресметаните камати за задоцнета исплата на долговите, како и барања за наплата на долговите со други средства на извршување. Потоа, 22 претставки се однесуваа на барања за одблокирање на трансакциски сметки, во 10 случаи побарана е помош поради неприменување на предвидените ограничување на извршување, а останатите претставки се однесуваа на одолжување на постапките на извршување.