Европската унија забранува разговори со рускиот претседател Владимир Путин во кое било официјално својство, изјави високиот претставник на Унијата за надворешна политика и безбедност Жозеп Борел, пренесува ТАСС.

Според него, унгарскиот премиер Виктор Орбан нема право да ја претставува ЕУ во потенцијална посета на Москва, иако Будимпешта моментално претседава со Советот на ЕУ.

„Премиерот Орбан не доби никаков мандат од Советот на ЕУ да ја посети Москва“, посочи Борел.

Тој нагласи дека ставот на ЕУ за специјалната воена операција на Русија во Украина „ги исклучува официјалните контакти меѓу ЕУ и претседателот Путин“.

„Посетата на премиерот Виктор Орбан на Москва се одвива исклучиво во рамките на билатералните односи меѓу Унгарија и Русија“, додаде Борел.

Тој нагласил дека фактот што Унгарија во моментов претседава со Советот на ЕУ не и дава право да ја претставува унијата на меѓународната сцена, одговорност што тој самиот ја дели со претседателот на Европскиот совет во заминување, Шарл Мишел.

Унгарскиот премиер Виктор Орбан претходно изјави дека не го претставува Брисел, туку дејствува во свое име во комуникацијата со Москва и Киев. Сепак, тој ниту ги потврди ниту ги демантираше информациите дека планира наскоро да ја посети Москва.

На 2 јули, Орбан го посети украинскиот главен град Киев, каде што се сретна со Зеленски и предложи Украина да објави итен прекин на огнот и да преговара со Русија. По патувањето на Орбан, европските медиуми претпоставуваа дека тој можеби ќе ја посети Москва на 5 јули. Сепак, претседателот на Европскиот совет, Шарл Мишел подоцна изјави дека Унгарија нема мандат од ЕУ да води разговори со Украина и Русија.