Во зградата на Националната опера и балет (НОБ) во моментов е исклучена струјата поради неплатени сметки, соопшти за СДК дирекцијата на НОБ.

ЕВН и компанијата ЕДС го дале налогот за исклучувањето на струјата. Како што дознава СДК, НОБ е исклучена од струја од 18 август, а долгот кон ЕДС е од март, додека кон ЕВН од мај. Според нив, долгот не е подмирен бидејќи сметката на оваа национална установа е блокирана поради поради спроведување извршно решение од 2012-2013.

„Согласно работниот процес, како и секоја година, уметничките ансамбли се на колективен одмор од крајот на јули до крајот на месец август, со што се надоврзуваме кон прашањето за реализација на програмските активности и почетокот на сезоната, за која подготвителни дејствија се преземаа и во текот на летото, поточно за балетската премиера ‘Пепелашка’ со која ќе ја отвориме новата сезона кон почетокот на месец октомври, со што се подразбира дека работните процеси продолжуваат“, велат од НОБ.

Од дирекцијата на НОБ за СДК велат дека се „во релација со сите засегнати страни, со цел наоѓање соодветно решение за новонастанатата ситуација“.