Турскиот дефанзивец Мерих Демирал беше херој на својата репрезентација и со два гола ја одведе во четвртфиналето, но сега би можел да се соочи со проблем.

Медиумите денеска пренесуваат дека Демирал може да биде казнет и суспендиран од УЕФА поради начинот на кој прославуваше еден од своите голови.

Имено, дефанзивецот славеше со симбол кој промовира десничарска екстремистичка идеологија која верува во супериорност на „турската раса“ и тежнее да ги обедени сите турски народи во една држава, која според нив се протега од Балканот преку Централна Азија, сè до Кина.

Новинарите му поставија и прашање за оваа прослава, но Демирал не гледа никаков проблем.

„Начинот на кој го славев погодкот е поврзан со мојот турски идентитет, затоа го направив тој гест. Видов луѓе на стадионот што го прават истиот гест, не постои никаква скриена порака. Сите ние сме Турци, горд сум што сум Турчин и само сакав да покажам колку сум среќен, се надевам ќе имам повеќе прилики повторно да го покажам овој гест“, изјави Демирал по натпреварот.

Како и да е, во медиумите се најавува реакција од УЕФА, но засега не е познато каква би била казната.