Муцунски официјално ја презеде функцијата министер за надворешни работи од Османи
![](https://www.slobodenpecat.mk/wp-content/uploads/2024/06/1.jpeg)
Во наредниот период Министерството за надворешни работи акцент ќе стави на забрзување на евроинтеграцискиот процес на земјава, стратешкото партнерство со САД, како и привлекувањето странски инвестиции, порача новиот министер за надворешни работи Тимчо Муцунски кој денеска официјално ја презеде функцијата од досегашниот министер Бујар Османи.
Како што соопштија од МНР, и покрај многуте предизвици, Муцунски најавил дека со посветена работа и решителност ќе бидат постигнати зацртаните цели во предвидената програма за работа на Владата.
![](https://www.slobodenpecat.mk/wp-content/uploads/2024/06/3.jpeg)
Во периодот што следи акцентот ќе биде ставен на забрзување на евроинтегративниот процес на земјава, стратешкото партнерство со САД, како и привлекувањето странски инвестиции, што е на линија на приоритетите на Владата. И покрај многуте предизвици, со посветена работа и решителност ќе бидат постигнати зацртаните цели во предвидената програма за работа на Владата – истакнал Муцунски на средбата.
Муцунски претходно беше градоначалник на Општина Аеродром, а денеска функцијата ја предаде на претседателот на Советот на општината, Дејан Митески.
Тимчо Муцунски е роден на 29.7.1989 во Берово. Муцунски има завршено докторски студии на Правниот факултет „Јустинијан Први“ при Универзитетот „Св. Кирил и Методиј“ во 2019 година. Магистерските студии ги завршил во 2011 година, а дипломирал на истиот факултет во 2009 година. Неговата академска кариера започнува како демонстратор и асистент на истиот факултет, каде што подоцна се стекнува со звање доцент.