Михаил Парушев со својата „Парусион груп“ во проширен состав ќе одржи концерт во „Станица 26“
Нови и моќни вокално-инструментални фанк њу поп-џез композиции на Михаил Парушев ќе можат да се слушнат на 4 октомври, од 20:30 часот, во „Станица 26“ во Скопје. Станува збор за материјали од новиот музички проект со наслов „За арно, за убаво“ на авторот Михаил Парушев, кој е тапанар и лидер на „Парусион груп“.
На концертот тој ќе настапи заедно со пријателите Зоран Костадиновски (гитара), Јован Цветковиќ (пијано), Иван Бејков (бас-гитара), Трајче Велков (труба), Петар Колевски (саксофон), Петар Христов (сопран саксофон), Драган Трајковски (вокал) и Елена Васова (вокал и перкусии).
На концертот ќе има уште неколку гости, кои ќе бидат изненадување за публиката. Концертот е поддржан од Министерството за култура на РСМ.
Музичарот Михаил Мишко Парушев е композитор и свири на ударни инструменти. Роден е во Скопје во 1976 година во семејство на музичари. Почнал да свири на тапани на шестгодишна возраст. Парушев е член на познатиот музички бенд „Леб и сол“.
Како автор и композитор настапува со „Парусион груп“, состав со кој одржал концерти низ целата држава, а годинава настапи и на фестивалот „Скопско лето“.
(Текстот е објавен во „Културен печат“ број 249, во печатеното издание на весникот „Слободен печат“ на 28-29.09.2024)