Премиерот на Грција Киријакос Мицотакис ја изрази својата поддршка за 21-дневен прекин на огнот во Либан, на средбата со неговиот либански колега Наџиб Микати, на маргините на Генералното собрание на ОН во Њујорк.

Мицотакис упати на потребата од деескалација со цел да се спречи ширење на војната низ регионот и загрозување на регионалната стабилност, пренесува Катимерини.

Сепак, Израел ги отфрли глобалните повици за прекин на огнот со движењето Хезболах, пркосејќи му на својот најголем сојузник, САД, и продолжувајќи со напади во кои загинаа стотици луѓе во Либан и ги зголемија стравувањата од сеопфатна регионална војна.

Израелски воен авион ја погоди периферијата на главниот град Бејрут, при што загинаа две лица и беа ранети 15, а една жена е во критична состојба, соопшти либанското Министерство за здравство.

На израелската страна на границата со Либан, армијата организираше вежба која симулира копнена инвазија – потенцијална следна фаза по немилосрдните воздушни напади и експлозии на комуникациски уреди.

Израел вети дека ќе го обезбеди својот север и ќе врати илјадници граѓани во тамошните заедници кои се евакуирани откако Хезболах минатата година започна кампања со прекугранични напади во знак на солидарност со палестинските милитанти кои се борат во Газа.

Слетувајќи во САД за да се обрати пред Генералното собрание на ОН, израелскиот премиер Бенјамин Нетанјаху им рече на новинарите дека војската ќе продолжи да го удира Хезболах со „цела сила и нема да запре додека не ја постигне целта, прво и основно безбедно да ги вратат жителите на северот до нивните домови“.

Ставот на Израел ги уништи надежите за брзо решение откако либанскиот премиер Наџиб Микати, чија влада вклучува елементи на Хезболах, изрази надеж за прекин на огнот.

Стотици илјади луѓе ги напуштија своите домови за време на најтешкото израелско бомбардирање на Либан од големата војна во 2006 година.

Хезболах се соочи со израелската војска откако шиитското муслиманско движење беше создадено од иранската Револуционерна гарда во 1982 година за да се спротивстави на израелската инвазија на Либан. Оттогаш еволуираше во „најмоќниот посредник“ на Техеран на Блискиот Исток.

САД, Франција и неколку други сојузници побараа итен прекин на огнот од 21 ден преку границата меѓу Израел и Либан. Тие исто така изразија поддршка за прекин на огнот во Газа.

Вашингтон сè уште бара прекин на огнот

Американскиот државен секретар Ентони Блинкен изјави дека големите светски сили сакаат прекин на огнот и дека ќе се состане со израелските официјални претставници во Њујорк.

Тој требаше да се сретне со израелскиот министер за стратешки прашања Рон Дермер подоцна во четвртокот.

Во Лондон, американскиот секретар за одбрана Лојд Остин предупреди дека постои ризик од сеопфатна војна на Блискиот Исток, но сепак е можно дипломатско решение.

„Значи, дозволете ми да бидам јасен, Израел и Либан можат да изберат поинаков пат, и покрај острата ескалација во последните денови, дипломатското решение сè уште е остварливо“, рече Остин.

Повеќе од 600 луѓе се убиени од понеделникот во израелските напади врз Либан. Хезболах истрела стотици проектили врз цели во Израел, вклучувајќи го и неговиот трговски центар Тел Авив, иако израелскиот систем за воздушна одбрана се погрижи штетата да биде ограничена.

Во средата, началникот на израелската армија го даде најексплицитниот јавен коментар досега за можноста за копнен напад врз Либан, велејќи им на војниците во близина на границата да бидат подготвени да преминат.

Израелски борбени авиони во четвртокот, исто така, ја погодија инфраструктурата на либанско-сириската граница за да го запрат трансферот на оружје од Сирија за Хезболах во Либан, соопшти израелската војска.

Либанското Министерство за здравство соопшти дека повеќето жртви во четвртокот биле Сиријци убиени во градот Јунин во долината Бека. Либан е дом на околу 1,5 милиони Сиријци кои избегаа од граѓанската војна таму.

Хезболах во соопштението рече дека го погодил градот Кирјат Шмона во северниот дел на Израел и израелската воена северна командна база, како и дека употребил оружје за противвоздушна одбрана за принудување на два израелски воени авиони назад.

Во Бејрут, илјадници Либанци побараа засолниште во училиштата. Во една од нив можеше да се видат жени како се наведнуваат низ прозорците на училницата, пушат цигари или ги проветруваат душеците од пена на кои спиеле оваа недела.

Хуманитарните организации дистрибуираа облека и храна и ги проверуваа лековите што им се потребни на постарите луѓе кои пребрзо избегаа за да донесат рецепти со себе.

Соседните земји се загрижени за безбедноста на своите граѓани во Либан. Турција се подготвува за евентуална евакуација на нејзините граѓани и странски државјани од Либан, изјави извор од турското Министерство за одбрана.

Израел стави приоритет на обезбедувањето на својата северна граница и дозволувањето на враќање таму на околу 70.000 жители раселени поради речиси секојдневната размена на оган, што Хезболах го иницираше пред една година во знак на солидарност со палестинската група Хамас во Газа, пренесе Ројтерс.

Израелските воздушни напади нагло се интензивираа од понеделникот, кога повеќе од 550 луѓе беа убиени во најсмртоносниот ден во Либан од крајот на граѓанската војна од 1975 до 1990 година.

Бомбардирањето уследи по нападите минатата недела кога пејџери и воки токи експлодираа низ Либан, при што загинаа голем број луѓе и беа ранети илјадници, вклучително и членови на Хезболах.