Мицкоски – Орбан: Денешната средба го потврдува нашето стратешко сојузништво
Премиерот Христијан Мицкоски утрово во Охрид се сретна со унгарскиот колега Виктор Орбан, кој е во дводневна посета на државата. Мицкоски ја опиша средбата како плодна и пријателска и порача дека Унгарија не е само партнер во европската сцена, туку и пример за тоа како една држава може успешно да го балансира националниот суверенитет со глобалната интеграција.
– Историјата сведочи за нашиот заеднички стремеж кон мир, просперитет и соработка. Унгарија во минатото беше еден од првите наши партнери кој ги препозна македонските стремежи за независност и суверенитет. Со години наназад, политичките и економските врски меѓу нашите држави се продлабочуваат, а денешните средби само го потврдуваат нашето стратешко сојузништво. Унгарија не е само наш партнер во европската сцена, туку и пример за тоа како една држава може успешно да го балансира националниот суверенитет со глобалната интеграција – напиша Мицкоски на неговиот фејсбук-профил.
По средбата следува заедничка меѓувладина седница, а потоа двајцата премиери ќе одржат прес-конференција.
Инаку, за време на посетата на унгарската владина делегација, вообичаено за гостите се организира прошетка низ Охрид и разгледување на најзначајните места во градот и околината. Па така, Орбан ќе ја посети црквата „Богородица Перивлепта“, како и Античкиот театар и манастирскиот комплекс „Свети Наум“, а заедно со Мицкоски и Орбан ќе положат и цвеќе пред споменикот на Свети Кирил и Методиј во Охрид.
Поради посетата на Орбан, СВР Охрид најави посебен сообраќаен режим. Засилено полициско обезбедување има низ улиците во и надвор од градот.
На улиците „Илинденска“ и „Коста Абраш“ е забрането запирање и паркирање возила, а кога ќе се движат возилата на делегациите, привремено за сообраќај ќе бидат затворени булеварите „Туристичка“ и „Македонски просветители“, улиците „Абас Емин“ и „Кирил и Методиј“ како и регионалниот пат Охрид – Св.Наум.
Дислоцирани се и возилата од паркинг-местата на булеварот „Туристичка“ и улиците „Коста Абраш“, „Цар Самуил“ и Кејот „Македонија“.