Мицкоски: Германската „ЕПСОТЕХ“ и белгиската „АИМ“ ќе инвестираат 20 милиони евра во нов производствен погон
Премиерот Христијан Мицкоски на социјалните мрежи најави нова германско-белгиска инвестиција. Тој соопшти дека германската компанија „ЕПСОТЕХ“ во партнерство со белгиската „АИМ“ ќе инвестираат во изградба на нов производствен погон, за што ќе бидат вложени 20 милиони евра.
– Одлична вест за сите граѓани е дека германската компанија „ЕПСОТЕХ“ во партнерство со белгиската „АИМ“ ќе инвестира во изградба на нов производствен погон, за што ќе вложи 20 милиони евра. Објектот ќе биде лоциран во општината Петровец, надвор од технолошко-развојните зони и во него ќе се произведуваат елементи од автомобилската, железничката и здравствената индустрија. Со градежни активности се почнува на крајот на август, а за една година се планира вработување на повеќе од 110 наши сограѓани. Тоа што е значајно дека дел од инвестицијата е и Центар за истражување и развој што дава голема додадена вредност и ќе значи ангажирање на високостручни вработувања. Инвестициите се решението за подобар живот на граѓаните – напиша Мицкоски.