Меси би можел да го пропушти четвртфиналето на Копа Америка
![](https://www.slobodenpecat.mk/wp-content/uploads/2024/07/12315652.jpg)
Ноќта меѓу четврток и петок, по средноевропско време, аргентинската фудбалска репрезентација ја продолжува одбраната на титулата на Копа Америка, а во четвртфиналната битка со Еквадор (03.00 часот) би можела да настапи без својот лидер и најсилен адут, Лионел Меси.
Капитенот на актуелниот светски шампион се повреди во второто коло од групната фаза, против Чиле, поради што го немаше во протоколот на мечот против Перу, а сега големо прашање е дали ќе може да му помогне на тимот во мечот без опоравување.
– Ќе почекаме уште неколку часа пред да донесеме конечна одлука. Секогаш е подобро да имаме уште еден ден – изјави селекторот на Аргентина, Лионел Скалони на последната прес-конференција, пренесоа медиумите.
Се разбира, Скалони сака да има таков велемајстор за додавање, дриблинг и шут во офанзивната линија како легендарниот играч на Барселона, поранешна ѕвезда на Пари Сен Жермен и сегашен член на Интер Мајами.
– Сакаме Меси да биде во тимот. Доколку не е подготвен, ќе го бараме најдоброто решение за репрезентацијата. Мислам дека е добро да тренира – се надева стратегот на „гаучосите“.
Натпреварот меѓу Аргентина и Еквадор ќе се игра утре во Хјустон, а Скалони го респектира противникот во битката за полуфиналето.
– Еквадор е трениран тим со добри играчи и добар селектор. Тие се еден од најдобрите селекции на Копа Америка. Имаат реални шанси да се борат за титулата – заклучи Скалони.