Поранешната германска канцеларка Ангела Меркел го прослави својот роденден со своите поранешни политички соработници. Церемонијата се одржа во Берлин во знак на своевидно помирување меѓу Меркел и кандидатот на Демохристијаните (ЦДУ) за канцелар Фридрих Мерц, пренесува ДПА.

Меркел на 17 јули наполни 70 години. По 16 години како канцелар, таа не се кандидираше на изборите во 2021 година.

Таа ја водеше ЦДУ од 2000 до 2018 година, а во 2002 година го замени Мерц како претседател на пратеничката група на демохристијаните во Бундестагот. Оттогаш се мислеше дека тие не се во добри односи.

Мерц сега беше полн со пофалби за Меркел. Тој ја нагласи нејзината поддршка за слободата и научната љубопитност, која ја покажа и во политиката. Поранешната канцеларка е доктор по физика.

Тој особено ја нагласи клучната улога на Меркел во зачувувањето на европското единство за време на еврокризата и пандемијата.

Мерц и се заблагодари за нејзината „политичка животна работа“ и рече дека се надева дека таа и понатаму ќе придонесува „во корист на ЦДУ“.

Зборувајќи за кандидатурата на Мерц за канцелар, Меркел му посака „се најдобро и многу успех во наредните месеци“.

Изборите за Бундестагот се закажани за септември следната година.

Меркел, која беше во друштво на нејзиниот сопруг Јоаким Зауер, сакаше да се одржи предавање на историчарот на уметност Хорст Бредекамп за прославата.

Бредекамп долго зборуваше за дијалектиката на просветителството, важноста на фотографиите и прашањето што се променило со откривањето на Интернетот.

Тој посочи дека Меркел за време на нејзиниот мандат како канцелар секогаш била свесна за опасноста од можен распад во Европа.

Тој откри и како ја запознал пред неколку години – преку Зауер – и дека ги сакал кифличките што таа ги правела.