Македонските пастрмајлии – хит на „Балкан фуд фестивал“ во Белград
Над 100 илјади посетители поминаа низ еден од најголемите гастрономски настани во регионот – „Балкан фуд фестивал“ – кој се одржа на крајот на септември во Белград. Балканскиот фестивал на храна беше спој на разновидна гастрономија во форма на улична храна, а беа претставени и традиционални производи од овие региони. Претставници од Белград, Нови Сад, Пирот, Нови Пазар, како и специјални гости од регионот, Македонија и Словенија, понудија деликатеси, вкусни печења, специјалитети од скара како и вкусови и мириси на фармите. Директорот и основач на Балканскиот фестивал на храна, Милош Вукшиќ, рече дека балканската кујна претставува спој на медитеранската и блискоисточната гастрономија, објави Пословни дневник.
„Имавме гости од Словенија, Македонија, беа понудени новопазарски ќебапи, пиротски специјалитети, заедно со печени производи и некои вистински, традиционални јадења“, рече Вукшиќ. Специјалитетите на ридовите, планините и рамнините на Медитеранот и Блискиот Исток, комбинирани во уникатните вкусови на балканската кујна, привлекоа толпи луѓе. Кумановецот Ненад Тодоровски, кој 12 години живее во Белград, прави хамбургери и познат е како македонски бургер-мајстор, понуди специјално дизајнирани јадења од Македонија.
„По повод Балканскиот фестивал на храна го сменивме менито и наместо плескавици претставивме македонски специјалитети. Решив да ја претставам македонската пастрмајлија, кај која целата поента е во тестото. Се прави на лице место и не е како пица, која луѓето често ја мешаат – откри Ненад, кој го води ресторанот „Македонски бургер бар“. На неговиот штанд за време на викендот, луѓето чекаа и до 45 минути за пастрмајлии.