Писателот Жарко Кујунџиски деновиве престојува во Италија, каде што ќе учествува на две јавни презентации на италијанското издание на романот „Америка“. Гостувањето на Кујунџиски во Италија е во рамките на проектот „Создадено во Европа: моќта на различноста“, соопштија од „Антолог“.

Првиот настан ќе се случи на 6 јули во градот Мола ди Бари, во просториите на книжарницата „Libreria Culture Club Cafè“. Настанот е со почетокот од 19.30 часот, а освен авторот за книгата ќе говори и преведувачката на италијански јазик Маријанџела Бјанкофиоре. Разговорот со нив ќе го води Џулија Барбаненте, а извадоци од книгата ќе чита актерката Ангела Јуриљи.

Следниот ден, на 7 јули 2023, во Полињано а Маре, Кујунџиски ќе учествува на 22-то издание на еден од најзначајните книжевни фестивали во регионот Пуља – „Il Libro Possibile“. Разговорот со Кујунџиски е предвиден на главниот градски плоштад од 23 часот, а модератор на настанот ќе биде Маријанџела Бјанкофиоре.

Фестивалот „Ил либре посибиле“ се одвива 8 дена на различни локации во градовите Полињано а Маре и Виесте и е од меѓународен карактер со огромен медиумски интерес. Истиот го посетуваат голем број читатели, а меѓу странските гости годинава е и познатиот шпански писател Фернандо Арабуру, автор на романот „Татковина“.

Фестивалот се одржува од 2002 година на иницијатива на културното здружение „Артес“, со цел културата и книгите да се „изнесат“ на плоштадите, а со тоа да се направат достапни за сите.

Фестивалот досега обединувал различни светови – добитници на Нобеловата награда, Пулицеровата награда, претприемачи, научници, актери, уметници и телевизиски личности – со цел да се дадат повеќе гледишта на реалноста и на литературата.

Како што веќе беше објавено оваа година, романот „Америка“ од Жарко Кујунџиски го доживеа својот превод на италијански јазик и книгата од печат излезе паралелно во Македонија во издание на „Антолог“ и во Италија за светскиот пазар во издание на издавачката куќа „Besa Muci“.

Преводот на италијански јазик е објавен со поддршка на програмата „Циркулација на европски книжевни дела“ во склоп на „Креативна Европа“ на Европската Унија – Потпрограма „Култура“, известија од „Антолог“.