Македонија да преземе реформи за справување со климатските промени, препорачува Светска банка
![](https://www.slobodenpecat.mk/wp-content/uploads/2022/11/климатски-промени.jpg)
Во изминатите 50 години Македонија се соочува со зголемен број на поплави, екстремни топлотни бранови, пожари и обилни врнежи. Само во последните две децении, земјата се соочи со 12 катастрофи поврзани со климатските промени кои погодија 1,3 милиони луѓе. Со растот на глобалното затоплување се очекува ситуацијата да се влоши во наредните години, а извештајот на Светска банка препорачува земјата да продолжи со пристапувањето во Европската унија, и да преземе низа реформи.
Директорот на Канцеларијата за Светска банка за Косово и Македонија, Масимилиано Паолучи, препорачува на преземање на итни активности за да се ублажат ефектите од климатските промени.
– Се очекува климатските влијанија да се интензивираат заедно со емисиите на стакленички гасови, со што земјата ќе биде потопла и посува, и ќе се соочи со почести и посилни поројни дождови кои ќе доведат до поплави – вели Паолучи.
Во извештајот се споменува важноста од паметните фискални политики за апсорпција на загубите поврзани со климатските промени и поддршка на одржлив економски развој.
– Даночната политика, на пример, би можела да го поттикне зелениот транспорт и одржливите технологии, со отстранување на крајните субвенции за електричната енергија на јаглен, а истовремено да ги заштити ранливите домаќинства од зголемените трошоци за енергија. Означувањето на буџетот за климатските промени и процесите на зелени набавки може да ги намалат економските трошоци и да ги заштитат јавните финансии – велат од Светска банка.
Од Светска банка препорачуваат Македонија брзо да воведе цена на емисии на јаглероден диоксид за да ги ограничи емисиите на стакленички гасови и да собере значителни приходи за државниот буџет, потенцијално до 730 милиони евра годишно.