Луксузни вили во Хонг Конг на работ на колапс
Луксузни дворци покрај карпите во Хонг Конг се на работ на уривање по рекордните дождови во кои загинале најмалку двајца, а повеќе од 100 биле повредени. Полицијата во Хонг Конг запечати најмалку три имоти на полуостровот Редхил, крајбрежна станбена област на јужната страна на островот, и евакуирала еден што бил во „непосредна опасност“.
Фотографиите од резиденциите вредни повеќе милиони долари покажуваат дека големи делови од карпата под базените и градините биле урнати. Властите потврдиле за медиумите дека имало докази за незаконски или неовластени градежни работи на двата погодени имоти, вклучително и бесправно изграден базен и подрум за кој наводно бил урнат дел од потпорен ѕид, пишува Гардијан.
Владините ресори сè уште истражуваат дали дивоградбите се поврзани со одроните. Секретарот за развој Бернадет Лин им рече на новинарите во неделата дека „примарниот фокус во овој момент е да се стабилизира наклонот за да се обезбеди јавна безбедност“.
„Кога тоа ќе се направи, ќе продолжиме со неопходните мерки за прекршување на законот“, најави таа.
Тајфунот Хаикуи е одговорен за најсилните дождови во Хонг Конг во последниве 140 години, што предизвикало огромни поплави и лизгање на земјиштето минатата недела. Поплавени се патиштата и метро станиците, а отсечени се и некои крајбрежни села. Предупредувањата за лизгање на земјиштето останале во сила во текот на викендот и вчера, при што луѓето биле предупредени да избегнуваат ризични области и патишта.