Во Македонскиот народен театар изминатата недела се случи отворањето на летната сцена „Славиша Кајевски“, која ги сплоти публиката, актерите, режисерите, музичарите и сите уметности на едно убаво место – плато/летната тераса покрај течението на реката Вардар.

– Нѐ сплоти Славиша и неговиот дух, тој ни даде крилја да полетаме со изведбите на прекрасните театарски претстави преплетени со урбана и квалитетна музика – истакна в.д. директорот Никола Кимовски на отворањето на сцената.

Следните настани се концепирани со театарска и музичка содржина, а настаните кои следат хронолошки се: концерт на „Пијан Славеј“ (24 септември), претстава „Кец на десетка“ (25 септември), претстава „Не се клади на Енглези“ (26 септември), хип-хоп концерт „LD Pistolero и Dj Goce feat. R.O.N.I.N“ (27 септември), „Сакатиот од Инишман“, дипломска претстава во изведба на ФДУ – Скопје (30 септември).

За крај на програмата на летната сцена во МНТ, на почетокот на октомври, ќе настапи Националниот џез-оркестар со изведби на композиции од „Битлси“ на 1 октомври, а свеченото затворање на летната сцена ќе биде на 2 октомври со концерт на култниот рок-бенд „Архангел“ – „Македонски подобро звучи: Едиција 4“. Сите настани се со почеток во 21 часот.