Рускиот министер за надворешни работи Сергеј Лавров убиството на лидерот на Хезболах Хасан Насрала во саботата го нарече „уште едно политичко убиство“ и посочи дека Израел сака да создаде изговор за директно вклучување на САД во конфликтот.

„И за да создадат таков изговор, тие се обидуваат на секој можен начин да го испровоцираат Иран, па дури и Хезболах. Ми се чини дека иранските лидери се однесуваат крајно одговорно и тоа мора соодветно да се оцени“, додаде тој, говорејќи на прес-конференција во седиштето на ОН.

Запрашан да ја коментира кинеско-бразилската мировна иницијатива за Украина, Лавров рече дека таа засега содржи само општи изјави.

„Сите зборови се точни во кинеско-бразилските 6 или 5 точки – повици за мир, повици за правда, за спроведување на меѓународното право. Па, никој не го оспорува тоа. Но, никој сè уште не ми кажа како планираат да се движат кон мир, а јас само знам дека ова прашање се уште се разгледува“, рече Лавров.

Тој нагласи дека Русија се уште се придржува до Новиот договор СТАРТ и не го зголемува својот нуклеарен арсенал.

„Договорот за стратешко офанзивно оружје меѓу Русија и Соединетите Држави е на сила до 2026 година, каде што се утврдени соодветните нивоа. Ние сме водени од нив, барем додека овој договор е на сила“, рече тој.