Поранешната пратеничка Софија Куновска смета дека ставот на СДСМ за одвојувањето на Македонија од Албанија на патот кон ЕУ, како еден од клучните приоритети на новата Влада, е „смешен и глупав“.

-Глупав е затоа што СДСМ многу добро знае дека и првиот ден по формирањето на Собранието, да отпочнеше постапката за уставните измени, до денес немаше да се заврши затоа што е подолг процес. Смешен е ставот на СДСМ заради тоа што не знам какви им се очекувањата – дека тоа што седум години не го успеаја во однос на евроинтеграциите, како очекуваат ВМРО-ДПМНЕ да ја заврши приказната за 100 дена, вели Куновска во емисијата „Само вистина“.

Според неа, и ВМРО-ДПМНЕ и новата Влада не треба да биде амнестирана за тоа што го направи во овие 100 дена.

-Самата ги подигна очекувањата во сузбивањето на енормниот криминал и корупција во државата како прв приоритет. Колку и СДСМ драматично ги изгуби изборите на ова прашање, сметам дека ВМРО има голема задача пред себе, истакна Куновска.

Поранешната пратеничка смета дека на новата Влада ѝ треба малку повеќе време, но „ако треба да се судат овие први 100 дена, нема простор за голема импресија и тој впечаток кај граѓаните е прилично присутен“.