Кујнското катче на Ана Крстаноска: Солени топчиња со фета
Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).
Готвењето ѝ е вистинска пасија и хоби на кое му пристапува со голема љубов и посветеност.
– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.
Денеска ви го претставуваме нејзиниот рецепт за солени топчиња со фета.
– Денеска имам да ви предложам нешто многу вкусно и екстра брзо. Идеални се за мезе и совршени кога немате баш многу време на располагање – вели Крстаноска.
Потребни состојки:
- 200 г фета сирење
- 100 г кисели краставички
- 50 г чајна или кулен
- 50 г печен сусам
- 100 г семки за обложување на топчињата
Подготовка:
За почеток, испасирајте го фета сирењето со виљушка. Потоа ситно исечкајте ги краставичките и чајната во сечкалка, но можете и рачно.
Потпечете го сусамот на тавче со повремено промешување, без масло.
Соединете ги сите состојки и оставете ги во фрижидер околу половина час. Доколку сакате да го забрзате процесот, оставете ги во замрзнувач околу 15 минути.
Како последен дел од постапката – оформете топчиња и обложете ги со семките.
Уживајте во оваа брза, но вкусна закуска!