Кремљ во понеделникот одби да каже дали рускиот претседател Владимир Путин ќе му даде интервју на американскиот новинар Такер Карлсон или дали тој е во Москва.

„Од нас тешко може да се очекува да обезбедиме информации за движењето на странските новинари“, рече портпаролот на Кремљ, Дмитриј Песков, на прашањето за шпекулациите дека Карлсон бил во Русија за да го интервјуира Путин, пренесува Ројтерс.

„Многу странски новинари доаѓаат во Русија секој ден, многумина продолжуваат да работат тука и ние го поздравуваме тоа“, рече Песков. „Немаме што да објавиме во однос на интервјуата на претседателот за странските медиуми“.

Карлсон е поранешен водител на Фокс њуз, кој во декември лансираше нова услуга за видео стриминг базирана на претплата за да ја искористи својата популарност меѓу конзервативните гласачи.

Интервјуто што тој го објави со Доналд Трамп минатиот август, привлече повеќе од 267 милиони прегледи. Каналот Маш на Телеграм во саботата објави слика од Карлсон и рече дека пристигнал во Москва.