Ковачевски: Имаме прецизен план за енергетската криза, но има и ризици
Денеска заседаваше Советот за безбедност, кој беше посветен на енергетската криза во земјава. Премиерот Димитар Ковачевски, по завршувањето на состанокот, на прес-конференција рече дека државата има јасен и прецизен план за справување со енергетската криза, но дека постојат и ризици. Засега, со спроведувањето на планот, не треба да има рестрикции, а за стопанството ќе се обезбеди струја по цена поповолна од онаа на берзите.
– Имавме продуктивен, добар и успешен состанок. Фактите се дека имаме висока цена на берзите и недостиг на струја во Европа. Нашата цел е на сите граѓани, на сите микро и мали претпријатија да им обезбедиме најевтина цена на струја, како што и сега правиме со субвенционирање на цената на домашното производство. За бизнисот што е на либерализиран пазар, целта е да се обезбеди цена што ќе овозможи да опстојат и да функционираат – рече Ковачевски.
За да се постигне овој план, рече Ковачевски, се обезбедува јаглен за РЕК Битола и Осломеј, се обезбедува мазут за ТЕЦ Неготино, а и за РЕК Битола и Осломеј, и се обезбедува гас за приватните компании за производство на струја ТЕ-ТО и КОГЕЛ.
– Има и ризици. Ризик се непредвидливи испади во РЕК Битола и во Осломеј поради апсолутна застареност на опремата, постара од 40 и 50 години. Непредвидливи ризици има и за цената на електричната енергија и гасот до ниво на неиздржливост, како и евентуални забрани за извоз на природен гас и на други суровини за производство на електрична енергија. Затоа имавме состаноци дома, но и надвор, како во Бугарија, која има вишок електрична енергија и која произведува базна енергија за регионот, како и со Грција која е логистички центар за Балканскиот Полуостров – рече Ковачевски.
Ковачевски, исто така, потенцираше дека поради тоа што сега сите купуваат јаглен и мазут, има недостиг на транспортни средства и високи цени за превоз. Тој апелираше и до копачите на криптовалути, тоа да не го прават во ова време.