Здружението „Контрапункт“ во рамки на програмата на „Крик“ – фестивал на критичка култура ќе го промовира македонскиот превод на двете книги „Дивидуа“ (2016) и „Дисeмблажа“ (2022) од Гeралд Рауниг, кои претставуваат два дела од неговиот голем и значаен теориски и епистемолошки проект наречен „Машински капитализам и молекуларна револуција“.

Двете книги се во исклучително продлабочен, прецизен и комплексен превод на Жарко Трајаноски, а се објавени во едицијата „Пунктум“, која „Контрапункт“ ја покрена во 2020 година, со цел да ја стимулира современата критичка теорија, филозофија и теорија на уметност и култура, преку преводи, но и преку промоција на домашни автори.

Промоцијата ќе се одржи на 4 јули (четврток), со почеток во 19.30 часот, во објектот Чифте амам при Националната галерија.

Во „Дивидуа“, Рауниг нè води низ испреплетената историја на индивидуалноста, општеството и заедницата, укажувајќи на можниот крај на централноста на „индивидуите“ и „индивидуалноста“ („поединците“ и „поединечноста“) како темелници на нашите доживеани современи искуства, а наместо тоа тој ги акцентира моделите на бидување заедно и на заедништво.

Додека авторот ги препознава реакционерните аспекти на „дивидуата“ и „дивидуалноста“, бидејќи тие се спојуваат со поими како што се дисперзија, егзистенција и сличност, тој, исто така, нуди продуктивна и позитивна перспектива за нас и нашата општествено-политичка ситуираност, за тоа што значи да се биде дивидуален денес.

Во „Дисeмблажа“ продолжува со развивање на некои од тие идеи и имајќи веќе воспоставено нов теориски јазик околу дивидуалноста, во вториот дел од „Машинскиот капитализам и молекуларната револуција“, Рауниг продолжува да експериментира со идеите, но и со формите на отпор и самоорганизирање, користејќи специфичен и уникатен јазик кој почива на синергијата помеѓу филозофската проза и теориското пишување.

Тој ги продлабочува изворите за инспирација, за да ги распали отпорите против современиот капитализам и експлоататорското заробување на нашите енергии, а настраната мисла и традиционалните места на заедништво ги спојува заедно во одбрана на праксите на бројни востанија и дисемблажи, кои ги трансформираат нашите идеи за заедницата и сè што таа може да биде.

Гералд Рауниг своите ставови ќе ги презентира преку дијалог со бугарскиот филозоф и теоретичар Станимир Панајотов. Низ разговорот ќе се разгледа значењето и влијанието на клучните критични прашања на нашето време. Книгите се издадени со поддршка на Гете институт – Скопје, известија од „Контрапункт“.