ЈП „Комунална хигиена“ и во текот на изминатите неколку дена реализираше повеќе вонредни активности за подигнување и транспорт на отпад од диви депонии на повеќе локации во Скопје.

Отстранети се приближно 330 кубни метри непрописно одложен кабаст, градинарски и мешан комунален отпад во близина на Арената Борис Трајковски и во населбата Трнодол во скопската општина Карпош, на улиците Никола Пушкаров, Христо Батанџиев и Лука Геров во општината Ѓорче Петров, на улиците Џон Кенеди, Вуковарска и Христијан Тодоровски-Карпош во општината Чаир, како и на улиците Февруарски поход, Коста Новаковиќ, Анастас Митрев и Васко Карангелевски во општината Аеродром. Како што информираат од претпријатието, повторно е интервенирано и на булеварот Никола Карев, во непосредна близина на Амбасадата на САД.

Отстранетите диви депонии се лоцирани околу контејнерите наменети за одлагање комунален отпад, а се создаваат во периодот кога садовите се сосема празни и отпадот може да се одложи во садовите – велат од „Комунална хигиена“.

Оттаму повторно апелираат граѓаните да престанат со непрописно и несовесно исфрлање отпад на јавни површини што директно придонесува за загадување на животната околина и го загрозува јавното здравје.