Ќе се реконструираат три улици во населба Лисиче
Во наредниот период реконструкција и санација ќе се врши и на други улици на територијата на цела Општина Аеродром
Општина Аеродром најави реконструкција на три улици во населба Лисиче. Станува збор за улиците Мите Богоевски, Црноризец Храбар и Илија Димовски.
– Општина Аеродром во наредниот период ќе започне со реконструкција на три приоритетни улици во населба Лисиче. Улица Мите Богоевски со должина од 1245 метри и улиците Црноризец Храбар и Илија Димовски со вкупна должина од 1 000 метри. Реконструкцијата ќе опфати целосна замена на асфалтот на коловозот на улиците, кои се широки по шест метри, како и на тротоарите од каде што дотраениот и оштетен асфалт ќе се замени со бекатон-плочки и други павер-елементи – велат од Општина Аеродром.
Според надлежните од оваа скопска општина, со реконструкцијата на овие улици се очекува значително да се подобри инфраструктурата во населба Лисиче.
– Во наредниот период реконструкција и санација ќе се врши и на други улици на територијата на цела Општина Аеродром – ветуваат од општината.