Каспер Шмајхел: Фудбалот и здравиот разум денес не одат заедно
Учеството на фудбалската репрезентација на Данска на Европското првенство заврши во саботата. Кристијан Ериксен и неговите соиграчи беа поразени од домаќините – Германија, со резултат 2:0.
Најдобар впечаток во редовите на Данците остави закоравениот чувар на мрежата – Каспер Шмајхел, кој по поразот не успеа да го сокрие незадоволството од судиските одлуки и примената на ВАР технологијата.
Прво на Данците им беше поништен гол, а потоа само пет минути подоцна беше досуден пенал за Германците.
– Во моментов чувствувам мешавина од разочарување, гнев, бес. Таков е фудбалот денес. Професионално играв фудбал 23 години и сè уште не ги знам правилата. Офсајд е офсајд. Може да биде многу и малку над линијата, но офсајд е офсајд. Не знам колку е доверлива технологијата, но мораме да ѝ веруваме – изјави Шмајхел за ITV, а потоа се осврна на пеналот досуден за Германците, кога топката го удри Јоаким Андерсон во рака:
– Не знам што Андерсон требаше да прави со раката. Имам чувство дека денеска деталите беа на нивна страна. Фудбалот и здравиот разум денес не одат заедно – рече голманот на данската репрезентација.
ФОТО: Погледнете го офсајдот кој им го поништи голот на Данците против Германија
