Првото рочиште за злоупотреба на спортските ваучери е одложено бидејќи првообвинетиот Дарко Каевски не се појави во судницата.

Како што информираше неговиот бранител Петре Шилегов, Каевски не можел да се појави на рочиштето бидејќи имал оперативен зафат на тетивата.

Покрај Каевски на обвинителна клупа ќе седнат и директорот на АМС, Наумче Мојсовски и претседателот на Македонски олимписки комитет, Даниел Димевски, потоа Огнен Стојановски, Ѓорѓи Тасев, Наташа Смилевска, Бејтула Емини, Дриљон Леши, Мијази Елмазов, Иван Миновски, Даниел Каров и Сашо Поповски.

Судењето го води судијката Џенета Бегтовиќ, а застапник на обвинението е обвинителката Лидија Раичевиќ која во изјава за медиумите рече дека случајот со ваучерите на АМС е специфичен по многу нешта, во кој има настаната штета од над 5 милиони евра.

– Случајот по многу нешта е специфичен, особено поради бројот на обвинетите, поради природата на кривичното дело, поради настаните кои се случувале и особено поради штетата која што е настапена, многу висока, изнесува над 5 милиони евра, рече таа.

Во врска со суштината на постапката, таа појасни дека има повреда на повеќе прописи.

– Тоа што во постапката која што беше системско решение за финансирање на спортот преку ваучерите, формирањето на законските тела, Централната комисија за евалуација на ваучери, овластувањата на директорите на АМС, не се испочитувани согласно Законот за спорт, согласно правилниците кои што предвидуваат почитување на строги критериуми за да може некој да добие ваучер, појасни таа.