Јужна Кореја ја претстави својата најмоќна балистичка ракета и друго слично оружје за време на церемонијата на „Денот на вооружените сили“ додека јужнокорејскиот претседател Јун Сук-јол предупреди дека „режимот“ на Северна Кореја ќе пропадне доколку се обиде да користи нуклеарно оружје.

Приказот на оружјето и предупредувањето на Јужна Кореја против Северна Кореја дојде откако Северот неодамна го откри својот капацитет за збогатување ураниум и тестираните проектили пред претседателските избори во САД во ноември, објави АП.

– Ако Северна Кореја се обиде да употреби нуклеарно оружје, ќе се соочи со решителен одговор од наша страна и страната на нашиот сојузник, американската војска. Тој ден ќе биде крај на севернокорејскиот режим“, им рече претседателот Јун Сук-јол на собраните војници на воениот аеродром во близина на Сеул – пренесува Танјуг.

За време на церемонијата, јужнокорејската војска покажа околу 340 парчиња воена опрема и системи за оружје.

Меѓу нив беше и нејзината најмоќна балистичка ракета, Хјунму-5, за која експертите велат дека може да носи боева глава тешка околу осум тони и може да навлезе длабоко во земјата и да ги уништи подземните бункери во Северна Кореја. Тоа беше прв пат Јужна Кореја да ја открие ракетата.