Јаневска: Наставниците се најважна алатка во образованието, без вас нема да има ниту една промена
![](https://www.slobodenpecat.mk/wp-content/uploads/2024/07/33_3.png)
Наставниците ќе бидат најголема потпора и поддршка во образовниот систем и ниту една промена нема да се случи без вас, порача министерката за образование и наука Весна Јаневска преку видео обраќање на отворањето на Синдикалните спортски игри на СОНК што вчера и денес се одржуваат во Струга.
-Сакам да знаете дека вие ќе ми бидете најголема потпора и поддршка во следниот период. Имаме големи планови врзани за подигнување на квалитетот на воспитно – образовниот процес, а во рамки на сето тоа, еден од фокусите ќе биде и враќање на вашиот дигнитет, достоинство и подобар статус во општеството – посочи Јаневска.
Министерката информираше дека сите незадоволства на наставниците, учениците и родителите ќе бидат елиминирани, но ќе продолжи да го надградува она што е добро и оценето како такво.
-Основното образование е приоритет, мој како министерка, и на Владата. Но, ниту една промена нема да се случи без вас. Затоа што сте најважната алка во воспитно-образовниот процес и јасно е дека ако не сме на иста страна, ако немаме усогласен став, нема да има успех. Затоа најавив и повторувам – ништо нема да правиме без ваша согласност, на сила или пак инкогнито. Помина тоа време – изјави министерката.
Таа, исто така, информираше дека ќе се организираат повеќе обуки, ќе се обезбедат учебници за сите ученици и приоритет ќе биде дигитализацијата и инклузијата на образовниот систем.