Израел побарал од САД да го одвратат Иран од одмазда за убиството на Насрала
Израел побарал од САД да преземат мерки за да го одвратат Иран од одмазднички напад како одговор на воздушниот удар од денеска, во кој беа убиени лидерот на Хезболах Хасан Насрала и генерал на Корпусот на Исламската револуционерна гарда, објави порталот „Аксиос“, повикуваќи се на двајца израелски и американски официјални лица.
Американскиот функционер за „Аксиос“ вели дека Вашингтон сега ќе работи на дипломатско решение за да спречи израелска копнена инвазија во Либан и иранско вклучување во тековниот конфликт.
По убиството на лидерот на Хамас Исмаил Ханије во Техеран претходно оваа година, за што беше обвинет Израел, Иран се закани со одговор.
За да го одвратат Иран, САД распореди свои сили на Блискиот Исток и преку дипломатски канали пренесе пораки со кои сериозно го предупредуваат Иран да не извршува таков напад.
Иран досега беше внимателен да избегне каков било напад врз Израел што би можел да го вовлече во голема војна, но официјалните лица во Вашингтон и Ерусалим се загрижени дека нападот врз Хезболах може да го турне Техеран преку работ.
Претседателот на САД Џо Бајден денеска издаде соопштение во кое вели дека му наредил на секретарот за одбрана „дополнително да ја зајакне одбранбената положба на американските воени сили во регионот на Блискиот Исток за да се одврати агресијата и да се намали ризикот од поширока регионална војна“.