Издавачот „Полица“ ја објави книгата „Моќта на делото“ од Санде Стојчевски
Книгата „Моќта на делото“ содржи есеи, критички текстови и разговори од нашиот поет и книжевен деец Санде Стојчевски. За книжевноста треба да се пишува, за книжевноста треба да се зборува. Токму тоа го прави Санде Стојчевски во својата нова книга во издание на „Полица“.
Во неа, на едно место се сместени критичките осврти што тој ги има пишувано изминатите години, а кои се однесуваат на поетски дела на Чедо Јакимовски, Ристо Василевски, Ристо Лазаров, Славе Ѓорго Димоски, Славчо Ковилоски, Елена Пренџова, Стефан Марковски и Павлина Атанасова; проза на Митко Маџунков, Билјана Станковска, Душан Стојковиќ или на научната студија на Иван Антоновски.
На критичките осврти им претходат два есеја за моќта на песната, а во третиот дел од книгата се сместени разговорите, односно интервјуата што низ годините со Стојчевски ги правеле многу новинари, пренесувани на различни медиуми.
Санде Стојчевски (роден на 16 септември 1948 година во с. Студена Бара, кумановско) е македонски поет, есеист, книжевен критичар и преведувач.
Дипломирал на Филолошкиот факултет во Скопје. Бил новинар, а потоа уредник во образовната редакција во Радио Скопје, уредник, главен уредник и директор на книгоиздателството „Македонска книга“ – Скопје, главен уредник на списанието „Стремеж“ – Прилеп и претседател на Управниот одбор на балканската книжевна манифестација „Рацинови средби“ – Велес. Член е на Македонскиот ПЕН центар и на Друштвото на писателите на Македонија.
(Текстот е објавен во „Културен печат“ број 249, во печатеното издание на весникот „Слободен печат“ на 28-29.09.2024)