Интервју со Моника Црнокрак, манекенка: Со Виктор љубовта почна на одбојка, тој е мојата најголема поддршка
![](https://www.slobodenpecat.mk/wp-content/uploads/2024/06/FotoJet-36.jpg)
Иако со манекенството се занимава од хоби, таа е асистент по маркетинг. Веќе четири години е во љубовна врска со Виктор Петров, кој ѝ е најголемата поддршка….
Моника Црнокрак (25), ќерката на македонските модели Светлана и Мики Црнокрак, сѐ повеќе го привлекува вниманието на јавноста. Лани ја освои титулата Мис фотогеничност на изборот за Мис на Европа што се одржа во Либан, а сега е сѐ повеќе актуелна како дел од екипата на „Голден карпет“, каде што за првпат работи како водителка на емисијата. Иако со манекенството се занимава од хоби, таа е асистент по маркетинг. Веќе четири години е во љубовна врска со Виктор Петров, кој ѝ е најголемата поддршка….
Се подготвуваш ли за летување? Што е за тебе идеален одмор и кое патување ти оставило најголем впечаток?
– Богами на овие пеколни температури, паметот ми е само на море. Прва дестинација за летово ми е Египет, подоцна имам и некои други испланирани патувања.
Секое патување си има свои убавини и тешко можам да се одлучам помеѓу релаксирачки одмор и патување со многу шетање и запознавање нови работи. Секако, доколку ми е потребен вистински одмор, идеален е оној со по цел ден лежење на плажа и мозокот пуштен на „пасење“. Меѓу патувањата со најголем впечаток, досега ми е дефинитивно Јужна Кореја.
![](https://www.slobodenpecat.mk/wp-content/uploads/2024/06/345589424_547136230931366_5567572486313271297_n.jpg)
Во изминатиов период сѐ повеќе си актуелна како водителка на ТВ-шоуто „Голден карпет“. Како излезе оваа работа и со оглед на тоа дека е прво ТВ-искуство, како се снајде?
– Сосема случајно, по разговор и желба на Миро. За мене беше изненадувачки предизвик и со задоволство пристапив кон тоа. Сѐ се учи, се стекнува навика и искуство, но се трудам секој пат да сум подобра и да ги подобрувам моите водителски вештини.
![](https://www.slobodenpecat.mk/wp-content/uploads/2024/06/11.jpg)
Асистент по маркетинг и дел од изборите за убавина во светот. Како ги усогласуваш двете работи и каде повеќе се наоѓаш себеси?
– Покрај примарната работа, манекенството и модата ми се хоби. Сѐ се може ако се сака, па секогаш правам баланс со сите обврски и ангажмани што ги имам. Во секој случај, не оставам работата да трпи.
Колкава поддршка добиваш од Виктор и како почна вашата љубов? Дали некогаш е љубоморен, со оглед на тоа дека си јавна личност и се занимаваш со манекенство?
– Со Виктор се запознавме сосема случајно, на рекреативна одбојка. Тој ми е најголема поддршка и секогаш стои зад моите одлуки, а ме бодри и во моменти кога навистина ми е потребно некој да ме подбутне. Нормално е да постои љубомора, но сѐ во свои граници.
![](https://www.slobodenpecat.mk/wp-content/uploads/2024/06/14-1.jpg)
Како е да се биде дел од модно семејството и со кого повеќе се консултираше за изборот на облека, и воопшто за изгледот пред излегување. Со Мики или со Светлана?
– Секако дека уживам во своето модно семејство, а родителите ми се најголемиот советник и поддршка во животот. Кога станува збор за мода и мојот изглед, нормално по женска линија се консултирам со мајка ми, а татко ми е тој што секогаш потврдно кимнува со главата.
![](https://www.slobodenpecat.mk/wp-content/uploads/2024/06/344563741_972390767228551_3642185964982285320_n.jpg)
Како го минуваш слободното време и што најчесто правиш, а што те прави среќна?
– Уживам постојано во присуство на моето куче Даша, која секогаш знае без проблем да ми предизвика среќа и насмевка на лицето со својата неизмерна љубов. Покрај семејството и Виктор, слободното време го поминувам со своите другарки. Партија јамб и пикадо ми е секогаш добредојдена за добро расположение.
![](https://www.slobodenpecat.mk/wp-content/uploads/2024/06/345605407_197293956036777_3542202419401824794_n.jpg)
Како ја одржуваш линијата и тешко ли е постојано да си во топ-форма?
– Линијата ја одржувам со вежбање, здрава исхрана и фастинг. Секако дека не е лесно да си постојано во топ-форма, во последно време малку „забушавам“, па тешко ми е да се вратам во онаа состојба во која сум била, но со желба, волја и посветеност верувам дека ќе си ја остварам својата цел за брзо време.
![](https://www.slobodenpecat.mk/wp-content/uploads/2024/06/344579303_1366602710853203_861892272575511708_n.jpg)
Со сестра ти Нина сте 13 години разлика, колку сте блиски и како функционирате двете заедно?
– Со Нина имаме посебна поврзаност, буквално сум ѝ како втора мајка. Таа веќе станува голема девојка и е вистинска убавица. Се радувам на нејзини години колку зрело размислува и како се однесува, а секако јас сум секогаш тука за неа, за совет, за симпатија, споделување тајна, па и рамо за плачење и секако најголема поддршка.