И Берлин засега само „внимателно следи“ што се случува во Полска
Шефицата на германската дипломатија, Аналена Бербок, вечерва изрази жалење поради експлозијата во која загинаа двајца луѓе во село во Полска, во непосредна близина на границата со Украина, јави ДПА.
„Моите мисли се со Полска, нашиот близок сојузник и сосед”, напиша таа на Твитер доцна вечерва. „Внимателно ја следиме ситуацијата и сме во контакт со нашите полски пријатели и сојузниците во НАТО”, рече таа.
Агенцијата пренесува дека НАТО и американското Министерство за одбрана (Пентагон) соопштија оти работат на утврдување на тоашто се случило во селото Пжеводов, на неколку десетици километри од Украина.
Владата во Варшава вечерва одржува кризен состанок и допрва треба да соопшти што точно се случило во селото.
Агенцијата АП објави дека, според неименуван висок претставник на американското разузнавање, врз селото во Полска паднале две руски ракети. Овие наводи досега не се потврдени, а Москва остро демантира дека се работи за нејзино оружје.
„Многу опасна ескалација од страна на Кремљ“: Сојузниците реагираат по ракетирањето на полско село