Воведувањето на задолжително служење војска во Хрватска, кое министерот за одбрана Иван Анушиќ го најави за 1 јануари, ќе мора да биде одложено поради политички причини поврзани со измените во овластувањата на претседателот на државата, пишува „Вечерњи лист“.

„Во овој момент чекаме политичка одлука, договор за неа и консензус и подготвени сме да ја спроведеме од моментот кога политичката одлука треба да почне од 1 јануари, од 1 јуни или од 31 октомври. Не ни е важно, кажете ми кога и ние почнуваме“, рече Анушиќ неодамна во Парламентот.

А „политичката одлука и договор“ се одложи за по претседателските избори, што значи дека воениот рок ќе мора да се воведе подоцна. Иако премиерот Андреј Пленковиќ најави поинаку, за таа тема не може да се прескокне претседателот Зоран Милановиќ, со оглед на актуелниот Закон за одбрана, а бидејќи изборната кампања е веќе започната, очигледно е дека нема да бараат договор на таа тема, пишува хрватскиот медиум.

Исто така, годинава нема да се спроведат најавените измени на Законот за одбрана со кои ќе се намалат претседателските овластувања, а со тоа и евентуално досегашната обврска за согласност на претседателот на одлуките како воведување воен рок. Дополнително, претседателскиот кандидат на ХДЗ, Драган Приморац, јасно се противи на промените во претседателските овластувања. Оттука, според „Вечерњи лист“, јасно е, иако тоа се уште никој не сака јавно да го каже, дека задолжителниот воен рок во Хрватска ќе мора да почека.