Министерството за надворешни и европски работи на Хрватска соопшти дека одлуката на Црна Гора да ја усвои Резолуцијата за геноцид во логорскиот систем Јасеновац и логорите Дахау и Маутхаузен не може да се смета за добронамерна и добрососедска во однос на Република Хрватска и дека не е во согласност со декларираната цел за членство на Црна Гора во Европската Унија.

-Министерството за надворешни и европски работи изразува жалење што Црна Гора одлучи да ги игнорира повиците на Република Хрватска да не ги политизира жртвите на Јасеновац и да не презема чекори кои можат негативно да влијаат на нашите билатерални односи и на европскиот пат на Црна Гора. Република Хрватска смета дека е неприфатливо, несоодветно и непотребно да се донесе резолуција чија намера не е да се изгради култура на сеќавање и помирување, туку да се инструментализира споменот на жртвите од Јасеновац за краткорочните политички цели на иницијаторите на оваа резолуција – се вели во соопштението.

Хрватите тврдат дека Резолуцијата за геноцид во логорскиот систем Јасеновац и логорите Дахау и Маутхаузен е одговор на резолуцијата за Сребреница.

Потсетуваме дека за усвојување на резолуцијата гласаа 41 пратеник, а еден беше против. Воздржани немаше.

Претседателот на Парламентот на Црна Гора, Андрија Мандиќ, веднаш по усвојувањето на Резолуцијата соопшти дека никој не се мешал во усвојувањето на Резолуцијата.

– Ова е резултат на нашиот договор и нашата идеја. Никој не се мешаше во ова однадвор. Сакам да им посакам добредојде на моите сонародници од Белград и Бања Лука во Црна Гора на Петровден, да се поздравиме братски и да кажеме дека ние сме сериозен народ, и дека овој регион има иднина – рече Мандиќ.