Гвардиола: Заврши сезоната за Родри, за жал ги добивме најлошите вести
Менаџерот на Манчестер сити, Пеп Гвардиола денеска изјави дека фудбалерот на неговиот тим Родри (28) ќе го пропушти остатокот од сезоната поради повреда на предните вкрстени лигаменти на коленото.
– Денеска беше опериран, мислам дека го повреди и менискусот. Ќе се врати следната сезона. Оваа сезона заврши. За жал, ги добивме најлошите вести. Понекогаш, за жал, тоа се случува. Тука сме да го поддржиме и да му помогнеме добро да се опорави, чекор по чекор – изјави Гвардиола на прес-конференцијата, пренесе „Скај“.
Шпанскиот фудбалер се повреди минатата недела на дербито против Арсенал (2:2), кога се судри со противничкиот играч Томас Парти.
Родри е еден од најважните играчи на Сити. Минатата сезона тимот ја освои рекордната четврта последователна титула во Премиер лигата, а ги претрпе сите три порази во првенството без Родри во составот.
Родри пред повредата го критикуваше продолжениот натпреварувачки календар и изјави дека играчите се блиску до одлука за штрајк поради преоптоварување.