Поранешниот прв вицепремиер Артан Груби, како што објави Слободен печат, ќе се врати на старото работно место на Универзитетот каде што претходно работел и ќе предава на Тетовскиот универзитет на Факултетот за новинарство. Тој нема да бара апанажа, за разлика од Бојан Маричиќ, Јетон Шаќири и Наим Бајрами за кои Собраниската комисија за прашања на изборите и именувањата денеска, во рамки на третата седница, со 10 гласови „за“ и еден „против“ ги поддржа нивните барања да земаат апанажа.

На Клиниката за дигестивна хирургија се враќа и Бујар Османи, а неговите сопартијци Фатмир Бесими и Крешник Бектеши се уште не одлучиле дали ќе побараат апанажа.

Претседателот на Комисијата, Ѓорѓија Сајковски, пред да ја затвори седницата, соопшти дека ги потпишал решенијата за плата на пратениците на кои Собранието им го верификуваше мандатот.

Собраниската комисија ги поддржа барањата на Маричиќ, Шаќири и Бајрами да добиваат апанажа

Колку функционери од претходната влада една година ќе примаат по околу 2.000 евра месечно ќе се знае до 23 овој месец, кога истекува рокот да поднесат барање за апанажа. Досега Комисијата одобри апанажа за 36 поранешни пратеници.

Од 20 министри, колку што броеше кабинетот на Ковачевски, нема многу поранешни министри да бидат на апанажа зашто повеќето ексфункционери од СДСМ се пратеници, вклучително и експремиерот. Освен Ковачевски, пратеници се речиси сите поранешни министри од СДСМ, и тоа Оливер Спасовски, Благој Бочварски, Јованка Тренчевска, Љупчо Николовски, Фатмир Битиќи, Славјанка Петровска и ексдиректорката на УЈП, Сања Лукаревска.

Османи ќе оперира, Груби ќе предава, а Маричиќ и Шаќири – на апанажа!