Град Скопје годинава ќе им помага на социјално загрозените граѓани да ги заменат старите азбестни покриви на своите домови. Вчера советниците ја изгласаа одлуката за определување на максималниот износ на поединечната субвенција за оваа намена.

Според одлуката, семејствата од оваа категорија ќе можат да добијат средства од Градот во износ од 50 отсто од вредноста на инвестицијата, но не повеќе од 150 000 денари, со вклучен данок. За оваа намена во Буџетот за оваа година се обезбедени 15 милиони денари, што значи дека ќе можат да се доделат поединечни субвенции на стотина семејства.

Условите, начинот и постапката за доделување на поединечна субвенција ќе ги пропише градоначалничката на Град Скопје, Данела Арсовска, врз основа на кои субвенциите ќе се доделуваат по пат на јавен повик.