Ѓоковиќ загуби сет, но се пласираше во третото коло на Вимблдон
![](https://www.slobodenpecat.mk/wp-content/uploads/2024/07/12347703.jpg)
Српскиот тенисер Новак Ѓоковиќ се пласираше во третото коло на Вимблдон, откако денеска во второто коло го совлада Британецот Џејкоб Фирнли со 6:3, 6:4, 5:7, 7:5.
Мечот траеше три часа и две минути. Ѓоковиќ е вториот тенисер во светот, додека Фирнли е 277 играч на АТП листата.
Ѓоковиќ влезе безбедно во мечот и лесно го доби првиот гем на свој сервис. Британецот возврати, а потоа се играше гем по гем до резултат 4:3 за српскиот тенисер.
Ноле направи брејк во осмиот гем, а потоа стигна до 6:3 и 1:0 во сетови на свој сервис. Еден брејк видовме во вториот сет. Ѓоковиќ искористи брејк топка во седмиот гем за да го освои сетот.
Вториот тенисер во светот направи брејк во петтиот гем од третиот сет. Британецот го врати брејкот во следниот гем и израмни на 3:3. Фирнли потоа направи уште еден брејк што му беше доволно да намали на 2:1 во сетови.
Британецот имаше две брејк топки во четвртиот сет при 3:2, но Ѓоковиќ успеа да го спаси својот сервис. Српскиот тенисер направи брејк во 11 гем за победа.
Австралискиот тенисер Алексеј Попирин е ривал на Ѓоковиќ во третото коло на Вимблдон. Попирин по голема борба и пресврт го совлада Аргентинецот Томаш Мартин Ечевери со резултат 3:2 (3:6, 6:4, 4:6, 6:4, 6:3) по три часа и 59 минути игра.