Три дена откако лизгањето на земјиштето уништи десетина куќи на рид во јужна Калифорнија, причината за катастрофата сè уште е нејасна, иако домовите продолжуваат бавно да се спуштаат во кањонот.

Шеснаесет луѓе се раселени откако земјата меѓу домовите почна да се лизга во текот на викендот, пишува „Гардијан“.

Видеото снимено од противпожарната служба на округот Лос Анџелес и објавено на Твитер го покажува уништувањето на домовите на врвот на ридот во Ролинг Хилс Естејтс, град со нешто повеќе од 8.000 луѓе на околу 40 км јужно од Лос Анџелес. Патиштата на погодените домови се целосно одвоени од асфалтот на кој некогаш биле поврзани, а покривите и гаражите се вдлабнати.

HOMES THREATENED by sliding hillside | FS106 | Pear Tree Ln #RollingHillsEstates | #LACoFD units were on scene monitoring situation. 12 homes evacuated. pic.twitter.com/ruXIhKD82m

— L.A. County Fire Department (@LACoFDPIO) July 9, 2023

Џенис Хан од округот на Лос Анџелес, чијшто дел ги опфаќа имотите на Ролинг Хилс, ја опиша штетата како „зачудувачка“. „Не можеме ништо да направиме, ми рекоа, за да го запреме она што се случува“, изјави Хан за Лос Анџелес „Тајмс“.

Окружниот проценител вети дека ќе ја преоцени вредноста на имотот за домовите што се уништени и потенцијално ќе ги намали или елиминира даноците на нивниот имот, се вели во онлајн соопштението на градот. Градскиот совет на Ролинг Хилс Естејтс, каде што се случува движењето на земјата, планира да прогласи вонредна состојба.

Ролинг Хилс Естејтс бил основан во 1957 година со цел да ја одржи својата „рурална атмосфера“, која се карактеризира со ридскиот пејзаж, се наведува на веб-страницата на градот. Денес, градот од високата средна класа има просечен приход на домаќинството од 160.000 долари, според најновиот попис.

Земјиштето под градот било на радарот на геолозите во изминатите 50 години, бидејќи талогот во кој се наоѓа темелот на погодените домови паднал, се збрчкал и се поместил со текот на времето.

„Замислете да исечете ров во пита со вишни: целото полнење ќе падне во дупката, а тоа се случува овде“, изјави за „Гардијан“ Колин Робинс, вонреден професор по наука за животната средина на колеџот Клермонт Мекена. „Без разлика дали тоа се должи на врнежи или штотуку го надминавме прагот, од геолошка перспектива беше прашање на време“.

Ролинг Хилс Естејтс се наоѓа на полуостровот Палос Вердес, кој се наоѓа над Тихиот Океан и е познат по своите луксузни имоти и винарии. Меѓу истражувачите како Робинс, оваа област е попозната по својата подложност на лизгање на земјиштето и меки седименти. Во 1956 година лизгање на земјиштето уништило 140 домови во областа Португалски Бенд во градот Ранчо Палос Вердес, исто така на полуостровот, а земјата продолжува да се движи таму, пишува „АП“.