Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – похуван карфиол.

– Похуваниот карфиол е однадвор крцкав, а внатре мек како путер. Јас го пржев во масло за готвење, а поздрва варијанта е да се пече во рерна. Карфиолот е многу здрав, а има специфичен вкус, но сѐ зависи од тоа како го подготвувате. Овој рецепт е брз и лесен за подготовка и вкусен за јадење – порачува Бобе.

Состојки:

– 1 главица карфиол
– 3 јајца, изматени
– 3 лажици брашно
– 150 грама презла
– зачинал, сол, лук во прав и масло за готвење

Подготовка:

Во зовриена вода се става лажица сол и исчистена главицата карфиол, да се вари десетина минути. Откако ќе се излади и исцеди, се сече на листови со дебелина од 1 см, секое парче се зачинува со зачинал и лук во прав. Потоа, секое парче се валка во брашно, па во јајце и на крај, во презла.

Се пржат во масло со средна температура, додека да заруменат или се редат во тава на хартија за печење и се печат 10-15 минути, во загреана рерна на 220 степени Целзиусови.

На здравје!