Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за неодолив гурмански деликатес – мини павлови.

– Уживајте во животот и во овие малите слатки задоволства, кои ќе ви го разубават секој ден! Овој лесен рецепт е комбинација од крцкави, ронливи и слатки ѕидови од белки, полни со фил и свежо овошје – порачува Бобе.

Состојки:

– 3 белки
– 240 грама шеќер
– 1 лажичка оцет

Фил:

– 150 грама маскарпоне
– 100 грама шеќер во прав
– 100 џем од јагоди/капини/малини
– 150 грама јагоди/капини/малини
– гранче нане за декорација

Подготовка:

Белките се матат со миксер – цврст снег, потоа, без да се прекине матењето, се додава постепено шеќер и на крај се додава едно мало лажиче оцет, не е важно каков, јас ставив јаболков, може и вински. Шамот се полни во торбичка од шприц и се формираат гнезденца во плех (обложен со хартија).

Се печат на 100 степени, во загреана рерна еден час без отворање, се исклучува рерната и не се отвораат уште 10 минути. Треба да се внимава да останат бели, да не заруменат.

Се филуваат пред да се сервираат – се става една лажица џем, се полнат со филот (изматено маскарпоне со шеќерот во прав) и врз нив се става свежо овошје по желба и ливче нане за декорација.

На здравје!