Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – лепчиња за хамбургер.

– Со малку квасец и љубов, ќе создадете неодоливи лепчиња за хамбургер, меки и воздушести како памук. Со едноставни состојки и лесна подготовка, овие лепчиња ќе го направат вашиот оброк незаборавен – порачува Бобе.

Состојки за тесто:

– 900 грама – 1 кг брашно
– 500 мл млако млеко
– 40 грама свеж квасец
– 1 голема лажица мед
– 1 голема лажица сол
– 1 лажица маслиново масло
– 2 жолчки за премачкување
– сусам по желба

Подготовка:

Во длабок сад се замесуваат сите состојки за тесто, освен жолчките и сусамот. Тестото треба да е меко, речиси лепливо, се покрива со памучна крпа и се остава да стаса околу 40 минути. Потоа, се вади од садот и се размесува на набрашнета површина. Се формираат топчиња со големина по ваша желба и се редат во тава обложена со хартија за печење. Повторно се покриваат со памучна крпа и се оставаат уште еден час.

Се премачкуваат со изматените жолчки, по желба се става и сусам и се печат 20 до 25 минути во загреана рерна на 230 степени Целзиусови, за убаво да заруменат.

Кога станува збор за совршен хамбургер, основата е подеднакво важна како и самото месо. Замислете си меко, воздушесто лепче, кое само чека да се наполни со вашиот омилен вкус.

На здравје!