Гастрономско уживање од вештите раце на Бобе Јанкоска: Корален колач со вишни
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Бобе денеска споделува рецепт за вистински гурмански деликатес – корален колач со вишни.
– Овој корален колач е прекрасна комбинација од сунѓересто тесто прекриено со вишни и ванила крем што ќе го разубави вашето вкусно патување – порачува Бобе.
Состојки:
За тесто:
– 80 грама путер (маргарин)
– 3 јајца
– 200 грама шеќер
– 250 грама брашно
– прашок за печиво
– 3-4 лажици млеко
Бел фил:
– 700 мл млеко
– ванила
– 150 грама шеќер
– 2 пудинга од ванила
– 3 лажици кисела павлака
– 5 грама желатин
– 500 грама вишни (исчистени од семки)
Корален прелив:
– 150 грама изблендирани вишни
– 100 грама шеќер
– 5 грама желатин
Начин на подготовка:
Се мати путерот со шеќерот, па се додаваат јајцата, млекото, прашокот за печиво и брашното. Оваа смеса се сипува во намастена тава и се пече 20 минути во загреана рерна на 175 степени.
Печеното тесто се полева со ликер од вишни и врз него се редат вишните исчистени од семки.
Млекото, шеќерот, ванилата и пудинзите се варат за да се згуснат. Кога ќе се згусне пудингот, се тргнува од оган и се додаваат киселата павлака и желатинот што претходно е растворен во ладна вода. Се меша убаво да се соедини. Вишните се полеваат со белиот крем што треба да биде топол и се остава да се излади додека се подготвува преливот.
Прелив: Зовријте ги изблендираните вишни со шеќерот. Се остава да вријат 5 минути па се додава претходно растворен желатин во ладна вода. Се меша се заедно и се прелева коралниот прелив врз изладениот бел крем. Колачот се остава 30 минути да се излади во фрижидер, потоа се сечат коцки. Кога ќе се сервира, одозгора може да се декорира со вишни и свежо нане. Уживајте во оваа вкусна артистичка комбинација и задоволство.
На здравје!