Музичката икона Селин Дион (55) се појави на годинашното доделување на наградите Греми и ја изненади јавноста со оглед на тоа што се соочува со тешка дијагноза – синдром на вкочанета личност. Видно емотивна, таа се појави на сцената со поддршка на нејзиниот најстар син Рене Чарлс Анжелил, пишува „Дејли мејл“.

„Ви благодарам на сите! Ве сакам. Изгледате убаво. Кога велам дека сум среќна што сум овде, навистина го мислам тоа – од срце. Оние кои се доволно благословени да бидат тука, на доделувањето на наградите Греми, никогаш не треба да ја земаат здраво за готово огромната љубов и радост што ни ја носи музиката во нашите животи и во живототе на луѓето ширум светот“, изјави пејачката пред да ги претстави номинираните изведувачи во категоријата за најдобар албум на годината.

Пејачката Тејлор Свифт победи во оваа категорија, освојувајќи статуетка за нејзиниот студиски албум „Midnights“. Со ова, таа испиша историја и стана музичар со најмногу победи во категоријата за најдобар албум на годината.

Пред неколку дена, беше објавено дека Дион подготвува документарен филм со кој ќе ја прикаже нејзината борба со синдромот на вкочанета личност и нејзината кариера среде дијагнозата.

Пејачката изјави дека со филмот „Јас сум: Селин Дион“ („I Am: Celine Dion“) сака да ја подигне свеста за нејзината дијагноза, која 1 беше дијагностицирана пред две години.

„За време на ова отсуство, решив дека сакам да го документирам овој дел од мојот живот, да се обидам да ја подигнам свеста за оваа малку позната состојба, да им помогнам на другите кои ја делат оваа дијагноза“, додаде таа.

Тоа е ретко нарушување во кое мускулите на телото и екстремитетите наизменично грчат и се вкочануваат.

„Последниве неколку години беа предизвикувачки – од откривање на мојата состојба, до учење како да живеам со неа и да управувам со неа, но не дозволувам тоа да ме дефинира“, објасни Дион.

Селин Дион сака да се врати на сцената, но нема да го стори тоа додека нејзиниот медицински тим не ѝ даде зелено светло.