ФОТО: Пендаровски во Полска пречекан со највисоки државни и воени почести
Претседателот Стево Пендаровски денеска во Варшава со државни и воени почести беше пречекан од претседателот на Република Полска, Анджеј Дуда, со што започна неговата дводневна официјална посета на Република Полска.
Претседателот Пендаровски оствари тет-а-тет средба со претседателот Дуда, на која беа потврдени искрените пријателски односи и плодниот политички дијалог меѓу двете држави. Теми на средбата беа македонските европски интеграции, партнерството во НАТО, војната во Украина и последиците од неа, како и глобалната економска и енергетска криза.
Во рамки на официјалната посета е предвидено претседателот Дуда да го одликува претседателот Пендаровски со највисокото полско одликување, Орден на Белиот Орел, додека претседателот Пендаровски ќе го одликува претседателот Дуда со Орден „8 Септември”.
-Посета на Полска како потврда за зајакнатиот политички дијалог меѓу Северна Македонија и Полска. Разговори со претседателот Анджеј Дуда за актуелните безбедносни прашања, енергетската и економската криза, предизвици со кои заеднички се соочуваме во Европа, напиша претседателот на државата Стево Пендаровски на неговиот фејсбук профил.
– Нашите европски интеграции се една од клучните точки на дискусија, имајќи ја предвид и силната полска поддршка што ја имавме за отпочнувањето на пристапните преговори со ЕУ, објави шефот на државата Пендаровски на фејсбук.
Претседателот Пендаровски ќе оствари средба и со премиерот на Република Полска, Матеуж Моравјецки, а заедно со претседателот Дуда попладне ќе присуствува и ќе се обрати на средба со претставници на полските комори и бизниси и македонски претставници од бизнис секторот.