ФОТО: Огромни редици за упис на ФИНКИ, идните студенти чекаат со часови
На Универзитетот „Св. Кирил и Методиј” Скопје денеска и утре е првиот рок за пријавување за упис во прва година во академската 2022/2023 година за кандидатите кои се рангираат само според успехот од средното образование. На Факултетот за информатички науки и компјутерско инженерство (ФИНКИ) идните студенти веќе со часови чекаат во долгите редици за да ги остават своите документи.
Идните студенти нестрпливо чекаат да ги остават документите и да ги започнат студиите, иако некои од нив се веќе нервозни поради долгите редици.
Како и во последниве години, така и оваа, трендот кај младите своите студии да ги запишуваат на ФИНКИ продолжува.
Некои од идните студенти за „Слободен печат“ велат дека го одбрале токму ФИНКИ поради широката понуда на студии, како и актуелната побарувачка во ИТ секторот.
„Отсекогаш ме интересирале компјутерите, па затоа мислам дека ФИНКИ е добро решение за мене“, вели еден иден студент.
Некои од студентите, пак, велат дека биле неодлучни, па според препораките на постарите пријатели и роднини, решиле да се запишат токму на овој факултет.