ФОТО | Објавена поканата за крунисувањето: Камила официјално станува кралица
Денеска беше објавена официјалната покана за крунисувањето на британскиот крал Чарлс Трети, кое ќе се одржи на 6 мај годинава, објави „Би-би-си“.
Новост е дека сопругата на кралот Чарлс Трети, Камила е наречена „кралицата Камила“ на илустрираната покана, наспроти нејзината досегашна титула „сопруга на кралот“. Тоа е јасен показател дека од 6 мај тоа ќе биде нејзината официјална кралска титула.
Извор близок до британското кралско семејство сугерира дека на почетокот од владеењето на Камила имало смисла таа да ја носи титулата „сопруга на кралот“, со цел да се разликува од покојната кралица Елизабета Втора, но дека сега веќе е „соодветно време“ официјално да ја добие титулата „кралица“.
На свечената церемонија во Вестминстерската опатија, на која ќе бидат поканети околу 2.000 гости, новата кралица Камила ќе биде крунисана покрај кралот Чарлс Трети, 18 години по нивната венчавка.
Дизајнот на поканата е на илустраторот Ендру Џејмисон и претставува рефлексија на долгогодишната еколошка кампања на кралот Чарлс Трети. Уметничкото дело содржи диви цвеќиња, птици и инсекти, како и национални и хералдички амблеми.